聞生兔B耍手擰頭 熊黛林恐難修身
熊黛林（Lynn）踏入兔年學插花，寓意花開富貴，她也祝福大家兔年行大運，個個心想事成。
之前一直於內地工作的Lynn，於新年前趕回香港過年，幸有奶奶負責辦年貨，她就負責為一對孖女準備新衫：「我都無衫着，掛住幫BB買新衫都忘記咗，因為過農曆新年對BB係好重要嘅節日，佢哋會好開心，我們大人一家人齊齊整整就滿足了！」至於兔年大計，她仍是想多些工作，今年目標就是想演反派角色：「上次《家族榮耀》自己壞唔晒，但幾過癮，所以想試做好衰嘅反派睇大家係咪好憎我，因為上次大家覺得我傻更更好戇居、好可愛，壞人做成咁都幾好！」此外，她亦希望能帶一對孖女去日本旅行，因3年來都沒出埠，孖女都好想坐飛機。問到會否順便製造兔B？她耍手擰頭說：「我呢個年紀唔好搞啦，驚修唔到身，生BB好辛苦，我當時都算係高齡，到依家只係回復以前嘅八成，如果依家年紀再生，可能一半都回復唔到，而且覺得兩個都夠啦，再多個BB會承受唔到屋企咁嘈，因為依家已經好嘈。」她指上次生完要花3、4年時間調養，老公也知她辛苦，所以對於是否再生他是沒所謂的，她有感而發說：「呢啲只有做媽媽嘅先會知，媽咪真係好偉大！」
