山聰教囝囝舞獅 傳承國粹
新年祝願人人有工開
出爐視帝陳山聰前晚聯同薛家燕、江嘉敏、余思霆、戴祖儀、「聲夢」歌手姚焯菲（Chantel）及鍾柔美（Yumi）等，在電視城為新春節目《新春保良迎金兔》進行錄影。自3歲便開始學舞獅的山聰，當晚更為節目開場舞獅助興，笑言新年大家醒一醒，是個好兆頭。他亦開始教兒子Jaco舞獅，以傳承這國粹。
疫情至今山聰已幾年沒有舞獅，對上一次是幾年前與好友郭政鴻一齊舞，「今年身邊好多兄弟終於有嘢做，因每逢新年或喜慶啲商場會請佢哋表演，證明興旺番，好事嚟嘅，2023年祝願香港所有人有工開，最緊要身體健康。」雖然幾年沒有舞獅，但今次表演也不必事前綵排，因要教兒子Jaco舞獅，所以平日都有在家中練習，他說：「Jaco唔驚，仲好鍾意，肯笠個獅頭，個獅頭係個兄弟整畀我做紀念，我都有畀自己舞獅片段佢睇。（Jaco有冇讚爸爸好有型？）佢未識，不過佢識讚我靚，上次頒獎禮套衫我喺屋企試咗一次，佢話：『爸爸，好靚喎』。」正趕拍新劇的他透露年廿九收爐，但年三十晚將出席商場新年倒數活動，年初三則與劉佩玥、陳展鵬及胡定欣到澳門出席花車巡遊，他說：「疫情後第一次返澳門，好開心返老家，不過屋企人全部過晒嚟香港，哈哈！」
Chantel將於農曆新年後到新西蘭升學，由於父母仍未透露出發機票的日子，所以未清楚起程日期，而她也繼續有工作，笑問是否趁新年賺多些錢？「我又唔係諗搵幾多錢喎，反而係走之前可以見多啲大家。」
姚焯菲忙於食餞行飯
而近日她就忙於跟同學及「聲夢」學員食餞行飯兼提早團年，但組合After Class隊友卻未有時間出席，「等我喺嗰邊減定肥，放假返嚟再食。」雖然還有幾日才新年，但因有家人從外地回港，所以她已收到新年利是，而過往她會將利是錢交給父母替她儲起，但今年卻不同，「佢哋叫我自己袋住。（利是錢點用？）通常係儲起，緊急時候先會用。」至於何謂「緊急」，就是想與朋友外出食飯時父母卻不在家，便會動用「緊急」儲備。Yumi同樣已收到利是，因有親友打算趁新年外遊，便預先給她利是，問到是否也交給家人替她儲起？「佢哋會關心下逗咗幾多利是，但畀我自己Keep。」
