未與連詩雅度期籌備婚禮 陳家樂首選岑珈其做兄弟
香港文匯報訊（記者 梁靜儀）陳家樂、陳曉華、阮浩棕、龔慈恩、陳嘉輝、魯振順、文雪兒、樊亦敏及何遠東等，昨日到將軍澳電視城出席無綫新劇《異空感應》（暫名）造型記者會，相隔7年再參與監製王心慰劇集的家樂，笑言擔心被「輪更」。家樂與連詩雅原定計劃明年中在港舉行婚禮，但兩人都要忙工作，仍未定到結婚日期，而他就首選岑珈其加入兄弟團。
首次擔任劇集男一的家樂， 在新劇中飾演心理犯罪學家，與陳曉華飾演一對 。家樂表示再拍劇感到有點驚及緊張：「 驚係因為當年拍《 逆緣 》係二字頭仲頂得順，今次再次挑戰體能，都有啲滴汗，因為今次大個咗，怕冇以前咁Fit，不過相信體能上可以應付到。」
家樂表示早前去了寧波工作，瘦了廿磅，他說：「可能食唔慣太油膩同埋生腎石有關，之前生過腎石以為唔會再生，點知返內地工作，隔離期間都無事，一出關即入醫院， 都有屙咗腎石出嚟，真係好痛，可能平時少飲水，需要改善！」
早前家樂成功向女友連詩雅（Shiga）求婚，問到婚禮安排，他透露兩人原定計劃明年中在港舉行婚禮，但因他們的工作已排到明年三月，Shiga有機會要出外工作，一直都未夾到期傾婚禮細節，就連婚紗相都未影，至於擇日子就交由女友負責，過大禮家長都有給意見，但他覺得最重要都是結婚當日。他說：「原來擺酒枱布顏色同枱上嘅花都要揀，暫時未計到人數擺幾多圍，但?家防疫政策放寬去到240人，（兄弟團人選？）岑珈其之前畀好多意見我，對方係首選。」問到家樂想收到楊老闆送什麼結婚禮物？家樂笑言不敢問：「希望佢……其實都唔需要，靠自己努力， 老闆出席已經好開心。」
陳曉華為拍劇上武術堂
本月12日是家樂的36歲生日，他透露當日與女友一起度過，而今年生日吃了很多個蛋糕，又與朋友打邊爐及燒烤慶祝。
陳曉華（Hera）在新劇中飾演一名警察，她指因角色要穿越時空，故最初收到劇本時睇到「爆頭」，要看三次兼做很多筆記才了解角色。
Hera透露因角色需要打，監製亦安排了她上武術堂，已上了兩星期堂的她笑說：「暫時都算合格，不過好耐冇做運動，加上之前韌帶撕裂，頭兩日整親條頸同大髀肌肉，令到之後嘅訓練都有啲辛苦，不過休息後可以繼續練。」她又指為了配合角色，特意壓低聲音說話，讓自己感覺硬朗點及男性化一點。
劇中她與家樂飾演一對，問到會否有親熱戲？她說：「暫時未睇到，不過劇本睇落都好Sweet，對白好肉麻，搞到我好尷尬。（同《美麗戰場》嘅角色反差好大？）係，呢次係大人嘅戀愛，同上次好唔同， 拍完套劇可能會知自己鍾意啲咩男人。」
提到她在《美》劇中飾演的林小美是繼「反骨琪」後，觀眾最想掌摑的角色，她笑稱：「我拍時都覺得林小美好蠢，但細個啲嘅女仔，可能都會戀愛大過天，（現實中係咪咁蠢？）當然唔係啦，覺得新劇角色好啱我，現實中我係男仔頭。」
