C朗囧樣熱爆網
英超老牌勁旅曼聯前晚開咧首騷，結果錄得113年來首次在奧脫福主場不敵白禮頓，賽後網上熱搜出現最多自然是金句「咪一Ｘ樣」，寸爆「紅魔鬼」管理層換湯不換藥，無論換上任何新領隊都依然輸波。至於另一個熱門話題，則是「型佬球星」C朗拿度被拍得的「囧」樣，笑爆球壇。
C朗今場被安排先任後備，在目睹球隊失守後流露出的「囧」樣相當搞笑，亦見無奈。這位葡萄牙球星下半場換入，球隊整體表現有所改善，主帥坦哈格賽後指出，C朗體能情況需要進一步提升，但有信心他在下輪賽事會有改進。同時坦帥亦批評球員缺乏自信及表現差，指令球員必須全速改善。
夏蘭特受訪兩度爆粗
另邊廂，曼聯同市死敵曼城則靠新兵夏蘭特梅開二度，作客打敗韋斯咸旗開得勝。賽後，夏蘭特受訪時兩度失控爆粗：「我真係應該連中三元，Ｘ，冇計啦！Ｘ！唔好意思，我啲英文真係麻麻！」至於主帥哥迪奧拿則寸爆球迷：「上星期你哋先話佢係水貨，依家又話佢拍得住亨利、舒利亞同C朗喎！」
