【專攻冷馬】旭日昇補中機會高
第一場、第四班、一○○○米。「敬惑」周歲時由廄主蔡約翰御用馬販購入，「摘星勇驥」子嗣出名早熟前速飛快，再睇番在港同父馬如「健康愉快」、「舞士精神」及「駿皇星」等俱為泥草勝任之馬；去季出道循例跑一場，唞半年之後今季十二月中重披戰甲，表現漸入佳境，曾在千四米跑第三名升火待發，今次棄中距離大幅縮程跑直路賽志不在小，已露殺機。
第四場、第五班、一八○○米。疫情下搵食幾艱難都好，大前提唔好有病，入醫院睇醫生都屬於高危，作為醫生馬主，就一定好想現身凱旋門見馬迷；「波哥哥」馬主陳欣永與蔡穎怡都係兒科專科醫生，佢個心一定唔想診所見到小朋友，不過睇過佢家長，都讚兩位醫生好窩心又有童真，今次「波哥哥」打王牌返田草增程肯定唔係玩玩，如果馬主睇電視見到愛駒贏馬，就好似見到健康兒童咁笑哈哈，就最好啦！
第十場、第二班、一四○○米。「旭日昇」賀廄今季四歲新貴之一，原本夠分出爭打大賽，但最終幕後認為長力不足放棄，寧願留力返中距離搏殺，呢匹今季澳洲揀手貨，來港前最後三仗贏晒，途程由千四至千六米；上年十月在港初出先在短途摸底，翌戰潘頓增程千四米水到渠成，勇挫「拍馬難追」輕鬆造一分二十一秒正確厲害，剛賽初上二班跑入Q，看來贏上頂班指日可待。
