【獨有消息】風雷電沈廄新武器
考考大家的記憶，今季令潘頓停賽的是那一駒，答案便是希斯馬房的「嘉應精神」，騎者因直路阻及「蒲俠超得」而被罰停賽兩日，事後據聞潘頓也自責太鹵莽。不過這兩日停賽的損失好快就攞番嚟，因為「蒲俠超得」再出已由騎開的巴度換咗潘頓，結果贏得頭馬彌補所失。今次「蒲俠超得」再遊勝地，卻遭潘頓推庄唔騎，原來他早已心有所屬，為沈廄的初出馬「風雷電」披甲。這件綵衣就是現今養在賀賢馬房的「大雷暴」，這駒馬主是十分支持韋達，購入「大雷暴」即加盟韋廄，可惜跑咗兩季，只得四次上名，今季踏入第三季，終於轉投賀賢馬房尋求突破。至於這匹「風雷電」，購入後則加盟在沈集成馬房，似乎希望用唔同的練馬師來訓練名下愛駒，希望早日贏出頭馬，一過拉頭馬癮。這匹「風雷電」上季尾六月中才開始投入操練，暑假大部分時間在從化打磨，九月底才返回沙田，到咗十月初，潘頓接手過檔，先試課一千米大閘，全程快開得第二名，以四分三身位負於「龍騰飛翔」蹄下，這仗後每逢快試潘頓都親力親為，足見重視程度，即使「蒲俠超得」上次贏完，但潘頓一早推庄「蒲俠超得」，一心一意騎隻「風雷電」上陣。至於「風雷電」的馬主，名下的「大雷暴」也曾倚重過潘頓跑過兩仗，其中一場便是跑得亞軍，因此與幕後也曾有過合作關係，這次「風雷電」列陣，潘頓即為其在港首戰披甲，相信會悉心以赴交出成績來。
