【本報消息】馬圈上陣不離父子兵
霍宏聲獲馬會給予公司騎師聘約，相信與其是現役練馬師霍利時的兒子不無關係，當然他本身也是南非騎校出身及其後成為冠軍見習騎師，總算也是冠軍級人馬。香港賽馬最著名的父子兵當數佐治摩亞與摩加利，當然期間老摩的另一個兒子約翰摩亞也有披甲上陣，但因體重關係兼策騎天分不如乃弟，故成績平平。另一對父子兵鄭棣池與鄭仲謀也曾威風一時，前者未從練之前曾是七屆冠軍騎師，卻因上海幫事件被馬會停牌。鄭仲謀原亦堪稱虎父無犬子，可惜少年得志不懂珍惜，其後屢犯官非自毀前程。父子兵這回事真係有辣有唔辣，因為其他練馬師即使給予坐騎，始終亦可能不無疑慮。霍利時今年五十八歲，只要成績維持達標，有六七年時間已足以栽培兒子成才。
要數歐洲近年最強嘅長途好手，不得不提高仕登訓練嘅「弦樂器」，呢匹三屆雅士谷金盃得主，雖然今年未能再次喺呢場大長途G1封王，但上個月二十號復出角逐倫斯度盃再嘗勝果，反映呢匹七歲老馬仍具戰鬥力。「弦樂器」上周五喺唐加士達馬場再踏征途，出戰三千六百米二級賽唐加士達盃錦標，結果喺好拍檔戴圖理胯下以兩個多馬位之先擊敗對手，繼一九年後再次贏出呢項錦標。對於第三十次出賽嘅「弦樂器」而言，今場勝仗亦意義重大，事關除咗攞到本身第十九場勝仗，同時亦係第十七場分級賽頭馬追平「天鷹翱翔」紀錄，並列成為於歐洲訓練而累積最多分級賽勝仗嘅佳駟。另外，由於「天鷹翱翔」部分分級賽頭馬於歐洲以外地區取得，因此單計歐洲成績，「弦樂器」獨佔鰲頭。賽後戴圖理坦言今場可算係「弦樂器」近年最輕鬆嘅勝仗，同時證明呢匹七歲老馬依然熱愛競賽，而練馬師高仕登亦大讚呢匹長途好手，今年四戰已贏三場。至於下個目標，練者透露「弦樂器」有機會遠征法國角逐嘉登大賽或留在英國角逐英國冠軍長途盃。
