最垃圾巴士線？
近日有網民投票選出九條「最垃圾九巴巴士線」，本報記者「跟車好貼」，乘坐入選巴士線，走訪多位司機，了解他們的看法與網民有何不同。
九巴214（油塘至長沙灣）
入選原因：行車時間長。
網民：由油塘開出，要兜勻藍田、秀茂坪、彩虹等地方，經常塞車，更有網民曾經歷全程兩小時的「行車地獄」。
車長：全程多站多人，但路線主要服務安泰邨居民，安泰邨交通不便，交通工具選擇不多，214線是安泰邨居民主要的出入方式之一。
九巴28B（彩福至啟德啟晴邨）
入選原因：兩站之間的距離短，行路快過坐車。
網民：兩個站行都行到過去，巴士要用一小時兜一個大圈，可謂「呃行車里數的最強王者」。
車長：只睇兩個終點站，直線距離是好近，但服務對象是「曲線」的，沿途會經彩德邨、樂華邨、聯合醫院、觀塘市中心、啟業邨及麗晶花園等，可為市民提供更多選擇。
九巴30（荃威花園至長沙灣）
入選原因：線路上有其他專線小巴車費更平，車程更短。
網民：荔景、麗瑤一帶有專線小巴線（往返美孚、荃灣），點解要搭30號？
車長：30號線是醫院線，途經多間醫院、診所，例如戴麟趾夫人診所、瑪嘉烈醫院等，主要服務對象是當區有需要的市民。
九巴248M（長宏循環線）
入選原因：走路15分鐘能到。
網民：步行至青衣站只需要15分鐘，何必要搭巴士？
車長：你哋後生就行落去啫，長宏邨一帶有很多老人家居住，佢哋行落樓都有困難，何況行去青衣站？所以呢條線主要是服務長者及行動不便的人。
九巴249X（博康至青衣站）
入選原因：路線選擇遠路。
網民：沙田市過青衣，點解要行青沙公路？明明行城門隧道仲快。
車長：城隧先慢啊！返工時間包你叫慘。其實行青沙公路主要原因係配合尖山隧道分流工作，亦算係本線特色。
九巴42C（青衣長亨邨至藍田站）
入選原因：兜來兜去，路程長。
網民：一程車，兜完成個青衣先出來，還要經荃灣、大窩口、石籬，要搭好耐先到龍翔道。
車長：邊有兜成個青衣咁嚴重？從青衣出來，都唔使20分鐘，不過如果乘客嫌耐，可以選乘X42C，唔經荃灣直接出大窩口。
九巴64K（元朗西總站至大埔墟站）
入選原因：車程長，要近兩小時才走完。
網民：60個站，兩個小時的路程，爬山咁爬。
車長：64K同53號線情況一樣，其實主要服務對象係大埔來回林村，元朗來回八鄉上村嘅居民，一樣係村民線，方便沿途一帶村民出入。
九巴40（荃灣麗城花園至麗港城）
入選原因：路線設計差。
車長：40號線以前同6D線好多站都相同，所以後來刪除了彩虹及美孚之間嘅路線，改經龍翔道及呈祥道。事實上，由荃灣去觀塘，又一定要行龍翔道。
網民：以前舊線會途經深水埗、石硤尾、九龍城等地，現在改行龍翔道，唔方便！
