謝賢周聰再結片緣 雞啄唔斷
馮寶寶身在大馬拍片打氣
謝賢（四哥）、周聰昔日在粵語片年代合作無間，今次在林家棟監製的電影《殺出個黃昏》再結片緣，前晚二人現身首映禮上雞啄唔斷，周聰上台時更開心興奮得險些絆到，幸獲家棟快手扶起，有驚無險，聰叔表現淡定，更大讚四哥永遠都青春美麗，永遠都擁有很多粉絲支持，冧得四哥笑到四萬咁口。
謝賢、林家棟、鍾雪瑩、周聰、李璨琛、林雪及顏子菲等前晚出席《殺出個黃昏》首映禮，女主角馮寶寶因疫情未能由大馬回港宣傳，但不忘拍片為劇組打氣，她說：「我其實都好想返嚟同你哋一齊睇，希望將來特別嘅日子可以情商戲院再放映，咁就可以同我啲朋友一齊睇，呢個係我嘅願望。我覺得自己能夠參與呢部戲係好興奮又好幸福，可以同四哥再一次合作，記得第一次合作我係演佢個仔仔，呢一次合作就可以坐佢旁邊一齊傾偈。」寶寶姐又感謝家棟邀她演出，讓她留下美好回憶。
問四哥是否已先睹為快看過自己演出？愛講笑的他表示只看了自己演出的部分，其他的不用看，在旁的家棟便踢爆早前專誠將新片送到四哥家中，見四哥睇完之後嘴角上揚，四哥點頭說：「如果佢沒送來給我看過，我就不會來，總之唔滿意唔收貨，但沒想到會如此滿意，認識家棟時佢仲係仔，家已經是演員同監製，做了大阿哥，我就四哥咋！」家棟笑說：「我犀利呀，開通宵嘅，叫7仔！記得當年演《新上海灘》舞台劇，我要扮四哥，見到四哥來探班時我戰戰兢兢不敢行近他身邊，沒料四哥行過來話仔扮好啲，然後便走開了，估不到大家多年後可以合作。」四哥聞言後百無禁忌說：「我專登唔死就是為了拍家棟，（家棟搵你會再拍？）我唔做了，會退休，我退休佢又要搵我，我唔退休佢哋又唔搵我。」問他下一部可希望「父子檔」合作？他拒絕謂：「唔好，費事佢威晒，唔同佢拍。」他又謂女兒婷婷不在港，但之前已見過外孫女。
鍾雪瑩獲派定心丸
至於片中跟四哥有不少對手戲的新人鍾雪瑩，坦言起初只從旁觀察四哥，不敢行近，之後四哥要脫掉墨鏡演出，又會主動同所有人傾偈，兼且請大家食蛋撻飲汽水，雖然她沒被四哥罵，但四哥會留意大家，又會讚他們比之前進步，對她而言已經是定心丸。
