方中信：個女係我的
圖：方中信不信徐子珊膽敢玩他
徐子珊、方中信及楊秀惠等，昨出席新劇《杏林心處》開鏡拜神儀式，對於有報道指子珊在拍攝期間有七宗罪玩殘對手方中信，包括扮大牌、屢遲到、懶對稿及不理對手感受等，子珊只承認自己曾偶爾遲到，但只是十五分鐘內而已，並揚言會改善，而方中信就力撐子珊，指報道並非事實，又謂給子珊甕缸做膽她也不敢玩他。
子珊偶有遲到
子珊已經為《杏》劇開了幾日工，對於被指七宗罪玩殘方中信，她只承認曾遲到，其他控罪都屬子虛烏有，她道：「其實我要借你們的筆多謝他，因為我的角色是CID，但自己並不熟悉CID的語氣、神態等，幸好有他主動給我好多意見，如果沒有他我會演得好吃力，（但你會否恩將仇報？）當然不會，如果我的工作有問題，周遭的人也不會這樣幫我啦！」不過子珊承認自己偶爾有遲到，但只是十五分鐘之內，自己也不覺什麼大問題，不過也明白遲到始終不好，所以將盡量作出改善，務求不會影響到別人。
「佢唔敢玩我」
至於方中信被問到是否給子珊玩殘？他笑道：「畀個甕缸佢（子珊）做膽佢都唔敢呀！都唔明點解咁寫！（子珊多謝你幫她？）都係為部戲好啫，有時編劇寫啲對白較主觀，可能自己又見得人多，咪幫手執執囉！（子珊是否遲大到？）冇，佢好準時，又做晒功課，如果一個演員成日遲到又唔專心，公司都唔會捧佢啦！（你有否教她做人道理？）唔使教，佢好聰明，唔使花好多時間溝通就CATCH到意思，（你這樣讚她，遲些就會傳緋聞說她電你？）遺憾就係冇電我，蝕咗添！其實之前睇佢的報道都有啲擔心，但合作咗一星期，佢唔係好似報道所講咁樣，不過自己好少見報，今次都不失為一個見報機會，（你的女兒是否你的？）個女係我的，都無第二個女人寫信俾我，（你有冇CUT莫可欣的信用卡？）好低Limit啫！（她生女你可有獎勵她？）獎咗公司畀佢啦！我間公司加埋佢個名，結得婚就要畀信心佢，（浪子方中信變了呢？）呢個月我變到頭都甩埋，之前幾日個女見到我唔笑，我不知幾驚，但今朝佢見到我笑嘻嘻，我即刻覺得股票蝕幾多都無所謂，（你的浪子綽號沒有了？）係化為烏有，我依家係一個好爸爸。」
