十佳麗泳裝上鏡露原形/鄭寶源聲稱從未造假
圖：十佳麗泳裝上鏡露原形
應屆港姐北海道外景昨日首次進行泳裝拍攝，十位佳麗一早便到大湯沼溫泉拍攝泳裝片段，她們全以白色泳衣亮相。雖然今屆佳麗象腿絕跡，但有幾位身材仍需改進，其中③鄭寶源（Grace）面試時被封為「逼爆徐淑敏」，不過昨日上圍明顯縮水，之前似有「裝假狗」之嫌，她與⑧熊穎詩（Mizuni）更有橙皮紋，後者且肚腩有摺痕。之前一直被忽視的⑦鍾溥敏（Mandy），與⑨袁嘉敏（Candy）同樣擁有豐滿上圍，Candy更自爆吳君如為她改花名叫「大波Candy」。
昨日十位佳麗一大清早到大湯沼溫泉拍攝泳裝片段，為了保護眾佳麗，大會在溫泉旁以膠紙搭建帳幕給她們休息，且每位佳麗出來拍照時，都有工作人員攙扶陪同，又不准傳媒在佳麗背後拍攝，全程做足一切保護措施。現場所見，佳麗們的身材大致平均，但有部分卻瘦致胸骨凸出，而身材最fit的有④劉倩婷（Sandy）、⑤馬詠恩（Winnie）及⑥黃嘉麗（Carly），上圍最豐滿的有Mandy及Candy，至於面試時被封為「逼爆徐淑敏」的Grace，上圍明顯縮水，且與Mizuni一樣有橙皮紋。Grace因為預了有泳衣示人這一環節，所以昨日表現淡定，對於她的上圍似縮水，她稱本身身材一向如此，「逼爆徐淑敏」只是別人給她的稱號。問她參選後可是消瘦了？她道：「一定瘦咗，但冇度過瘦幾多。（可擔心被指之前裝假狗？）我的身材一直係咁，無所謂，可能件衫唔同咗。（你也有橙皮紋喎？）天生嘅，我好鍾意游水，做劇烈運動都會有橙皮紋。（可擔心影響成績？）唔怕，健康最緊要，而且評判係睇整體。」
袁嘉敏被改花名
由於大會仍未公布佳麗的三圍數字，記者只能靠肉眼量度，估計Candy上圍有34D。對於記者稱讚她胸部豐滿，Candy笑道：「多謝，多得吳君如之前成日喺電台節目話Peter（陳可辛）秘書叫大波Candy，搞到好多電影人都知道我呢個稱號，最初都有唔鍾意，但都講咗成年時間，依家只要叫的語氣唔好咁鹹濕就得啦！」又她為了參選而積極修身，吃得好清淡，但前日拍攝做雪糕時，就一口氣吃了三杯，因而被記者取笑她「出貓」，她笑道：「個個都食兩三杯，拍嘢又食一杯，因為香港冇得自己做雪糕，所以會食多啖。（你是否常飲奶？）以前在澳洲讀書，當地人的確好鍾意飲牛奶，但依家自己已經飲少咗。（經過今日是否信心大增？）會呀！變大膽咗，明日再着泳衣就唔會似今日咁慌張。」之前平平無奇的Mandy昨日突然成為豐胸一族，因而被指禾稈冚珍珠，她即道：「唔係，係衫的問題。（但你上圍好豐滿？）係呀！（可擔心焦點落在胸部？）唔會嘅，今日因為着泳衣才會留意身材啫！」
熊穎詩瑜伽修身
Mizuni自覺身型平均，對於被指肚有摺痕，她不以為然道：「正常會有少少肚腩。（但你的臀部也很有分量，會否努力修身？）最緊要健康，而且我有做瑜伽，我覺得自己好平均，亦冇諗過身材會輸蝕。（你都有橙皮紋？）橙皮紋好正常，好多女仔都有。（那你可有哪些地方不正常需要改善？）我覺得自己好平均，對自己有信心，冇唔正常。」⑩李姿敏（Germaine）自稱骨架大令她看起來身型橫，加上來北海道吃了很多海鮮，有少少增磅，但仍覺得自己身型平均，不過大家都覺得其腰肢似乎太多肉，她聞言即道：「我會注意，多謝！（會否做多些sit up運動？）我平時都有運動，亦唔覺得身材方面會輸蝕，因為仲要睇其他方面。」
馬詠恩對腰最滿意
Winnie對於被讚身材fit，她道：「我身型一向都係咁，冇刻意減肥，OK啦！（可知Candy吃雪糕豐胸？）我成日都有食雪糕，但唔係為豐胸，只係鍾意食啫！（經過今日可有增加了自信？）OK啦！我喺澳洲都有着比堅尼，但今日咁多人影相就有啲怕醜。」她又謂最滿意自己的蠻腰，但希望再瘦一些。雖然每位佳麗都有特別之處，不過②林潔瑜身材平均又夠高，令她最為欣賞。
