Eason踩場千嬅興奮
圖：Eason（右）作狀吻千嬅
楊千嬅《Minor Classics》演唱會前晚第四場演出，到Encore時間，千嬅感觸地說：「第一場係帶住Rehearsal心情。第二場會開始攰，因為用盡咗體力。第三場開始就進入狀態喇，但係到第四場開始就唔捨得，第五場就會喊喇」。正當台下歌迷報以熱烈掌聲鼓勵之際，千嬅突然發現低調到場的好友陳奕迅竟坐於台下，令她極為興奮。
讚好聽
千嬅說：「估唔到你會嚟喎，好開心，今晚其實係一個reunion，真係好開心，其實今次呢個騷好大意思，因為係我自己16年以嚟嘅一個總結。其實我16年即係你都16年喇，哈哈哈」。全場觀眾得知Eason在場之後不斷起鬨。之後千嬅續說：「不如你哋畀啲掌聲陳奕迅喇，你哋咁興奮。」全場掌聲雷動之後，千嬅再笑說：「呢啲仲唔係民望？我睇好你呀陳奕迅！」之後全場觀眾一同要求Eason上台，Eason最後不敵觀眾與千嬅邀請，上台後工作人員為他帶上耳筒，他即說：「喂喂，做咩伸手入我條底褲度呀你？」然後就大談日前首次接新娘的趣事。之後說：「我不嬲都好少聽女仔唱歌，但係我頭先聽你啲歌好好聽，又話sidecut，點解我有聽過嘅？不如唔好阻大家時間，係咪唱歌呀？」
無遺憾
千嬅聞言即說：「無端端請你上嚟，我驚唔啱數呀，怕你經理人公司會鬧」。然後又說：「我哋唱咩歌呀？其實最近我最鍾意千嬅一隻歌係《狼來了》，但係我唔識歌詞喎」。此時即有工作人員拿着有歌詞的平板電腦上台，Eason見到工作人員的效率即笑得跌坐地上。兩人唱畢半首《狼來了》後，千嬅上前擁抱Eason，豈料手拿平板電腦的Eason，仍然繼續唱，令大笑姑婆千嬅再次忍俊不禁。最後千嬅說：「我做完呢場騷冇乜遺憾㗎喇」。而Eason則搞鬼地說：「多謝樂隊先，我真係未試過攞住呢份嘢嚟唱歌。」最後又嘟嘴作狀吻別千嬅再落台。
