張天愛自認零分老婆
圖：張天愛（左）接受汪曼玲訪問，自認不識做老婆
張天愛（Flora）亮相有線《星級會客室》，接受資深傳媒人汪曼玲專訪。經歷多次婚姻失敗的Flora更自稱是「零分」老婆，應去上堂重新學做人妻。
談到與丈夫羅素分開的因由，Flora說：「其實我哋已經分開咗年幾。我想喺中國發展事業，佢都有試過學中文、留喺中國陪我，但佢始終鍾意繼續喺美國演戲。一對夫妻唔可以長時間分開生活，各有各忙，咁對佢好唔公平。分開係我做的決定，我哋無第三者，亦無金錢糾紛，而家我哋分開咗仲有傾有講，我哋永遠都係家人。」
「離婚可以係喜事」
經歷四次婚姻失敗，Flora不禁自嘲：「離婚次數冇人夠我多㗎喇。」她又坦承自己不懂做老婆：「曾經有超過50個人話想同我結婚，因為表面上我符合晒大家心目中老婆的條件，高高瘦瘦、讀過下書，入得廚房出得廳堂。但原來我做人老婆係攞零分！」但Flora不覺得自己失敗：「我覺得婚姻應該要係合約制，離婚就好似張合約完咗咁，其實可以飲返餐慶功宴，離婚都可以係喜事。我同羅素由一齊到分開都學咗好多野，而家大家都好開心，只係大家有緣無份啫。」問Flora會否期盼第五段感情，她表示：「將來的事我都唔知，但我唔會對感情灰心，唔會怕。」
