廿呎「棺材房」真實體驗
圖：香港社區組織協會將「棺材房」搬至銅鑼灣街頭展出/大公報記者孫凌奕攝
十月五日係世界居所日，鄭晴尋日見到一個「衣櫃」喺銅鑼灣展出，莫非要唱梁漢文首K歌「躲於衣櫃裏，躲於失落裏……」鄭晴仔細睇睇，原來展出嘅「衣櫃」係一個真實住人嘅「棺材房」。香港社區組織協會幹事Angela話，依家喺深水埗、油麻地、北角甚至灣仔，仲有好多咁嘅「棺材房」。喺800至1000呎嘅空間，可以擺放35至45個床位，平均每個人淨係有20呎嘅空間，平均八個人共用一個廁所，租金仲要2000幾蚊！
72歲嘅嚴生依家就住喺油麻地嘅一個「棺材房」入面，佢每個月賺5300蚊，棺材房嘅租金就已經要2600蚊，佢喺度住咗17個月，其實嚴生都有申請公屋，但係等咗兩年都未輪到。「一日24小時，我有17小時出街，去圖書館、公園坐，睡覺再返去。」嚴生話，自己年紀大，行動唔方便，「棺材房」空間細，其實上落床對佢都係好難。嚴生又同鄭晴話，租房剩低嘅錢都不夠食飯，肚餓就搵社區中心提供嘅免費麵包和奶茶。
Angela話，藉世界居所日，佢哋想透過活動向公眾訴說喺繁華都會背後貧困嘅一面，希望政府增建公屋，設立中短期房屋策略，以過渡性房屋安置劏房居民。佢哋仲會由今日至十月九日喺香港文化中心展出由攝影師Benny Lam影嘅「侷住」房屋攝影展，展現劏房居民嘅生活。
