美芬反拉布 歌仔有得唱/鄭晴
圖：美芬話因為早前颱風襲港突然有半日空檔，就有錄呢首歌嘅念頭 /資料圖片
經民聯立法會議員梁美芬每逢選舉年，都會推出一首主題曲。2012年美芬推出咗首《快樂西九》，事隔四年，今年立法會選舉又點呢？美芬尋日就同鄭晴分享咗首唔派台嘅歌曲喇。歌名叫《反拉布之歌》，上口程度同《快樂西九》旗鼓相當㗎！
呢首《反拉布之歌》嘅歌詞包括，「再係咁『拉布』，實聽無嘢撈」同埋「我哋要反『拉布』，我哋要香港好」等等，話要展示市民反「拉布」嘅決心喎。至於點解會有呢首歌出現？鄭晴聽聞就係因為早前颱風妮坦襲港時，美芬突然有半日空檔，喺同朋友傾電話期間，就傾出錄製呢首歌嘅念頭，之後就多得資深音樂人林慕德嘅幫忙，借出歌曲畀美芬親自填詞，最後仲同美芬及一眾反「拉布」嘅市民一齊合唱添。如果大家想聽呢首歌，只要今日去到美芬嘅社交網站專頁，就會聽到㗎喇！
不過，講番「拉布」嘅問題，身兼香港科技園公司董事局主席嘅行政會議成員羅范椒芬（Fanny）其實都希望新一屆立法會議員唔好再「拉布」。上屆立法會就創新及科技局嘅成立「拉布」，結果呢個政策局遲咗三年幾先成立，Fanny尋日就話，上屆「拉布」太蹉跎歲月，依家嘅香港科技比好多鄰近國家落後，所以希望大家可同心推動科創。Fanny又話，今屆立法會選舉有好多新面孔，如果年輕候選人成功進入議會嘅話，希望佢哋目光要長遠啲，要為香港大局而努力，唔好淨係諗住四年任期嘅利益喎。
鄭晴提提你，梁美芬已報名參選立法會九龍西直選，呢區其他候選名單仲有：蔣麗芸、狄志遠、譚國僑、游蕙禎、黃碧雲、劉小麗、李泳漢、朱韶洪、黃毓民、何志光、關新偉，毛孟靜、吳文遠及林依麗。
