周柏豪只求照顧好家人
不被偏激網民影響生活
《2020年度勁歌金曲頒獎典禮》各獎項塵埃落定，其中「最受歡迎男歌星」獎首次鬧「雙胞」，由周柏豪和胡鴻鈞「同享」，但兩人都未覺獎項被分薄，更是惺惺相惜，柏豪聲言不會視對方為勁敵，認為這想法好落後，而被蔡思貝降呢是朋友的胡鴻鈞自言要好好檢討，並會「搵日」跟她慶祝大家「稱王封后」。
柏豪和胡鴻鈞一起受訪，對於齊奪「男歌星」獎有分薄之嫌，柏豪稱他們私下是老友，見到朋友進步很開心，「公司覺得我哋都值得嘉許，無人講過只可以得一個，也不覺被分薄。（對方是勁敵？）今時今日仲覺得別人係勁敵係好落後嘅想法，做好自己先，唔好同咩人鬥。」提到他早前的「愛國論」慘遭一些偏激網民攻擊，他重申沒什麼可回應，「希望大家搵到理想生活，我繼續照顧好屋企人便可以。（有粉絲說割席？）多謝佢哋咁多年支持，會繼續用努力告訴所有人點樣做好自己，當然見到支持我嘅人對自己失望會唔開心，但人必須向前行，要自己生活開心才有信心做任何事，屋企人係我最大能量，尤其係個女，見到佢開心平安便是我這兩年最大目標，其他事都係次要。」
胡鴻鈞被「降呢」會檢討
首次獲「男歌星」獎的胡鴻鈞前晚共奪5獎成為男歌手大贏家，他謙稱：「能夠出席都是大贏家，特別在這段艱難時間仍堅持出作品，值得給予掌聲。（加簽長約？）沒傾過，我們講心不講錢。」說到他跟緋聞女友蔡思貝分別稱王封后（視后），「搵日慶祝再通知大家。（有傳她被有米老闆力追？）佢剛攞完大獎，一定有好多新聞，不過佢工作同生活上都好獨立，身邊人關心佢多過佢關心自己。（嗰個人係你？）佢有好多朋友。」問到兩人關係？他形容是好朋友，但思貝把他們關係降呢是「朋友」，他笑說：「係咩？我返去檢討吓先，我就視身邊每位朋友都係好朋友。（相信思貝有新戀情？）我關心自己有冇新戀情多啲，有會同大家分享。」
菊梓喬被指在「零」對手下三連霸奪「最受歡迎女歌星」獎，她說：「點會冇對手，不過自己每次都覺得是最後一次上台，所以特別珍惜。（成為大贏家？）每個獎都來得不易，一直好多謝有劇集令首歌更受歡迎。（少了勁敵吳若希？）佢從來不是競爭對手，是一位前輩，衷心祝佢湊BB快樂。（想佢以後專心湊B？）唔係，有小朋友係好幸福嘅事，我未有BB，只有工作，今日都算有幾個BB啦（指獎項）！」
莫文蔚憑《呼吸有害》一曲橫掃4台音樂頒獎禮的歌曲大獎，合共為她帶來6個獎項，她興奮說：「發夢也估不到這首歌咁爆，得到咁多人鍾意和翻唱，令我更想回來分享，未來都會再做廣東歌。」
