【網議政事】抽水蕭若元無戴罩 「熱狗」中回力鏢
經常發表撐暴言論嘅時評人蕭若元日前喺台灣地區搭高鐵時除低口罩拍片，結果俾台灣民眾投訴，令蕭若元要跪低道歉。「熱狗（熱血公民）」主席鄭松泰（蟲泰）就撲出嚟抽水，喺facebook發帖叫大家遠離「黃絲」，「因為排港潮就是這樣煉成的。」不過，「熱狗」明明自己都唔戴口罩嚟「公民抗命」，民建聯立法會議員張國鈞就喺fb反問蟲泰：「唔知鄭松泰有無叫鄭錦滿下次都戴返個口罩先擺街站？」
話說日前有人向台灣傳媒投訴蕭若元喺高鐵車廂內唔戴口罩拍片，講足18分鐘，有關行為違反當地規定，事件被揭發後，蕭若元只好道歉。
張國鈞回帶蟎仔無罩擺街站
不過，「同路人」蟲泰都係踩多腳，截圖有關報道話︰「認真講兩句，移居『海外』的朋友保重，最緊要虛心學習融入當地社會，盡量認識當地朋友，更直白地說，遠離『黃絲』。因為排港潮就是這樣煉成的。」擺明覺得蕭若元影衰香港人。
講得咁擲地有聲，點知之前「熱狗」成員鄭錦滿（蟎仔）擺街站時都無戴口罩，更聲稱咁做係搞緊「公民抗命」喎。張國鈞就寸返蟲泰問：「講開又講，唔知鄭松泰有無叫鄭錦滿下次都戴返個口罩先擺街站？非常時期，搞『公民抗疫』好過啦。」
「熱狗」有口話人、冇口話自己，自然俾網民指責。「Shawn Ng」反問︰「戴唔戴口罩關政治咩事？」「Kwok Yan Chung」叫大家認清事實，「係害命，唔係抗命，不要混為一談。」■香港文匯報記者 郭家好
