【網議政事】「黃圈」爾虞我詐 「渣哥」死咬「龍門」
「黃店」為咗食「人血饅頭」奮不顧身，成個「黃圈」變成咗爾虞我詐嘅戰場，而「渣哥」同「龍門」更係打得火熱，當中嘅愛恨情仇更可以拍成一齣連續劇。雖然「龍門」早前高調退出「黃圈」，但「渣哥」仍然想斬草除根，就此有網民喺「連登」以「狗改不了吃屎 挑戰連登仔底線 渣狗：唔好幫襯龍門」為題發帖，指「渣哥」好無品德，處處都針對「龍門」。不過講到尾，「渣哥」同「龍門」其實咪又係一擔擔，真係五十步笑百步呀。
年僅13歲，名為「骨頭脆」嘅網民日前喺「連登」發帖，並上載一張截圖，內容係一名「黃絲」提名到底邊間「黃店」有盆菜做，而「渣哥」回應話好多「黃店」都有賣，但都好小家咁不點名批評「龍門」，叫佢唔好幫襯已經退出「黃圈」嘅店，咁擺到明即係「龍門」啦。唔知如果「龍門」老闆「饅頭張」知道「渣哥」時時刻刻都將佢放在心上會係乜嘢感覺呢？
多名網民就似乎唔多認同「渣哥」呢種行為，仲話覺得好噁心同好賤格。「上返馬蹄路」話點都唔會幫襯「渣哥」，「就算唔幫襯龍門，都唔會幫襯你人渣哥囉。」
疑似「渣家軍」嘅「Martin」話：「一事還一事……不過今時今日中立就係藍，叫人唔好幫襯『非黃店』有咩問題？」而「龍粉」「都得先生」就叫「渣哥」收聲，「收嗲啦人渣，訂咗『龍門』盆菜今晚食。」
不過，網民「失業毒男」就睇穿一切，「好×煩。但聽日鵝頸個（嗰）間又會大把人排隊。」■香港文匯報記者 郭家好
