免費睇病
老有所醫
人口老化，給社會帶來的最大沉重負擔，是醫療。
他不是醫生，但有一個仁心，希望人人老有所醫。五年前開始，他四出找醫生和醫護人員組成一個團隊，免費為長者睇病。
被人奚落，不要緊！說他妙想天開、痴人說夢，他也不介意。看盡人情冷暖，絲毫沒有動搖他的執著與堅持。
五年後的今天，已有逾百位專業醫護人員加入團隊，有西醫、中醫、牙醫、護士、物理治療師、藥劑師。他的職責是做配對。
「老有所醫」創辦人招鎰安說：「一件啱嘅事，只要你堅持落去，一定做到！」
大公報記者
關據鈞（文） 凱 楊（圖）
老有所醫慈善基金FB圖片
從母親病逝說起……
暖暖善心 換來冷嘲聲
二○一五年某天，當時任職行政主任的招鎰安，天天如常打電話給母親。招的母親在加拿大居住，老人家對兒子說身體有點不適。
沒多久，媽媽突然走了！
「毫無先兆，病情惡化得很快。我記得，收到媽媽離開消息時，我要開會，因為是有公眾參與的會議，不能改期，也不能缺席。你想像一下，在當時的情況下，你仲要面對公眾，仲要工作，要壓抑自己嘅情緒，唔可以喊，仲要集中精神開會。」
會後，上司問他是否家中發生了事，他如實相告。
只要堅持 一定做得到
隨後，他想了很多事，包括長者的未來。
「我在想，香港有咁多長者，佢哋嘅晚年點過呢？佢哋沒有受過什麼教育，但係佢哋係曾經不眠不休，努力剪線頭、穿膠花嘅人。佢哋為今日嘅香港貢獻，係令到香港成為國際大都會嘅開發者。但佢哋冇強積金，亦冇退休金。」
「我可以搵一些醫生，為長者贈醫施藥嗎？」招鎰安跟朋友說出這個想法，沒想到一顆熱暖的善心，竟然換來冷嘲聲，有人笑他「大想頭」，有人笑他不了解醫療界，有人笑他「得閒得滯」……
雖然被嘲笑，但他仍天真地安慰自己：「即係一件係啱嘅事，無理由無人支持你。你堅持落去，一定做到。」
出錢又出力
覓同路人 碰釘中成長
招鎰安沒有氣餒，繼續尋找同路人，無論是相熟的、生疏的，他都一個一個去找、去問；當然，他不斷碰釘。
終於，他成功游說到第一個願意免費為基層長者看病的醫生；然之後，又有第二個醫生加入；然之後，因為有了醫生圈子，這些醫生又找來其他醫生和醫護界專業好友加入。最終，他們更成功找到願意為長者贈醫施藥的人。
不斷找人，不斷游說醫護界人士加入，團隊就不斷壯大。
申慈善機構 搞足一年
招鎰安不懂醫人，但他擅長做行政，有他的一套：他會找醫生，也會找有需要幫助的病人，「搵病人唔難，但要搵有需要嘅基層，就要搵機構協助。」
於是，他又繼續不斷聯絡非政府機構和社福組織，商討合作。
無人手，煩！無病人，煩！有病人，更煩！
招鎰安解釋，「醫生出錢又出力。有些老人家窮，唔敢過海，義工醫生會貼錢叫車，接佢哋嚟睇症。」
雖然付出一顆真心，招鎰安也曾遇上「騙子」，「話自己冇時間，不斷改期，最後先發現嗰位長者原來去咗廣州玩。」結果，他還要向醫生道歉和解釋。
找到人手，連繫上受惠目標，「老有所醫慈善基金」啟動，專門服務六十五歲以上、申領綜援的長者。
不過，另一個挑戰又降臨招鎰安的面前，因為基金要申請成為慈善機構，即所謂的「第八十八條」。「要準備大量文件，又要不斷同稅局聯絡、解釋，足足花咗一年先至成功申請到。」
時至今日，「老有所醫」已找到一百一十名專業醫護人員加入，涵蓋近八成的專科，並能以最快一個星期內為獲轉介的病人提供服務，除了門診，也為有需要的病人提供上門診症、檢測，甚至進行小型手術，而且全部免費。
「公立醫院資源十分有限，大家都知要排幾耐。我哋就係唔使佢哋等。最重要嘅係，畀你排到，要跟幾個科，你要去幾次醫院，但我哋就一次過同你做晒佢。」招鎰安說。
為方便長者，他們有時會借用學校禮堂，一次過為約二百至三百名長者「睇病」。
招鎰安謙虛地說，「我算不上感動人物，真正令人感動嘅，係唔收錢為長者服務嘅醫護。」
醫生貼埋錢 真心感動
「團隊中有啲醫生係喺醫療集團做嘢，佢哋診症係有成本，佢哋支付埋拆畀集團嘅藥費同行政費，貼錢做義工，仲要唔同我講。」
「其實佢哋每為一個長者睇症，自己要出二百蚊畀公司。佢哋出力又出錢，先至令人感動！」招鎰安續說，「唔少醫護人員亦會長者支付費用，有啲長者要照磁力共振、驗血、驗其他指數，好多都係醫護幫長者畀埋錢，無同我講。」
「老有所醫」運作至今超過五年，已成為同類型最大規模的醫療社福服務團隊之一。他現時面臨另一個挑戰，是如何妥善安排睇症，「我好感動，佢哋（醫生）好有心，但我要安排佢哋輪流睇症，唔可以集中喺某幾個人身上，但難度在於有時較多某一類病人，或某時候總會某啲醫生有時間。」
五年來，聽盡冷嘲熱諷，他從不介懷，只介意曾送上冷言冷語的人，看到「老有所醫」今天的規模，態度急轉。「佢哋會同我講，我支持你呀，阿邊個邊個話想捐錢畀你。我會答：好呀！」表面上他講得輕鬆，內心其實十分難受，始終他把這些人看作朋友。
下一站……
痴人追夢 盼開老人院
致力服務長者，招鎰安見慣生老病死！
「我都知人會跌Watt，我唔怕面對，山地都搞掂晒。我同其他長者一樣，都係唔想自己成為後生嘅負擔。死咗？簡簡單單就可以喇，唔使乜嘢風光大葬。」他說得豁達。
「老有所醫」上了軌道，招鎰安還想做得更多，他打算開辦一所老人院。
行吓中環 當短途旅行
「我希望嗰種老人院係好理想，我哋可以得閒帶佢哋去唔同地方行吓，可以去下中環，我知道好多長者其實無去過，佢哋早年喺廠做嘢，然後湊細路，再幫細路湊孫。我哋可以帶佢哋去戲院睇吓戲，有資源嘅話，仲希望可以帶佢哋去旅行，長途唔得嘅，就短途。佢哋真係辛苦咗一世人，好多嘢都仲未見過。」
或許，對於某些人而言，這是痴人說夢話；但對於招鎰安，只要肯追夢，可能再一次夢想成真。
