（香港文匯報 記者 文根茂）正常人都知犯罪坐監唔係乜光彩事，但「黃絲」就覺得坐監即「英雄」，而最識得自我包裝嘅前「香港眾志」秘書長黃之鋒（河童）當然深諳此道。佢早兩日入監後即刻扮慘，先係透過社交平台小編自爆因肚內有異物而須單獨囚禁，又稱囚室24小時亮燈，令佢難以入睡等等。當「黃絲」吹奏話河童遭受「非人待遇」，等啲矛頭指向懲教署。有同樣經驗嘅「同路人」、「熱狗」副主席鄭錦滿就睇唔過眼，開post鬧「河童」「嘩眾取寵」，話就算唔係監獄入面嘅醫院，大倉都唔會熄晒所有燈，「事無大小都舉耙，只會令入面嘅人更難受」，擺明諷刺某人連坐監都淨係掛住做騷呢。
首日入冊 團隊即出帖炒作
喺舊年6月21日煽動群眾圍堵灣仔警察總部嘅河童，日前喺法院承認煽惑他人明知而參與未經批准集結及組織未經批准集結兩罪，即刻還柙。咁快認罪以為佢係真心悔過？你就太天真。入去頭一日佢嘅團隊就喺facebook出帖炒作搞事，話探河童時得知佢被單獨囚禁，原因係河童抵達監獄時，透過X-ray發覺其肚內有異物。
個帖文描述，「之鋒指單獨囚禁期間不能『放風』，即除了探訪時間外，其餘時間他均需待在囚室，而囚室廿四小時都要亮著（着）電燈，令人難以入睡。縱然如此，之鋒表示他會努力熬過⋯⋯」
呢招扮可憐，果然好快就博得班「黃絲」迎合，話呢啲係「虐待囚犯」「特登為難」，仲要有人戲好足話：「看到這個消息即時哭了。」「黃媒」亦跟風「宣傳」河童有幾「慘」，藉機煽動「抗爭」。
咁都抽到水，搞到鄭錦滿好不滿，噚日就喺facebook發帖話，「其實呢，就算唔係監獄入面嘅醫院，大倉都唔會熄晒所有燈，在囚人士都係各自想辦法去適應環境。」
佢又專登提到自己坐監時幫人嘅經驗暗捧自己，話曾經有在囚者想同佢調床位，因為唔熄嗰盞燈對正佢床頭，而佢係開住燈都瞓得着嘅人，「影響不大，咁咪唔介意對調囉。」
佢仲話，啲在囚者都會用書本、衣物去遮住自己對眼，或者用竹蓆架設喺兩張碌架床之間嘅上層，用以遮擋照到落下層嘅燈光。似乎想表明呢啲根本好小事。
指講事實非幫懲教講說話
鄭錦滿又解釋，唔係幫懲教講說話，只係有被告查詢，先寫兩隻字講講實況，「唔想有心理準備或需坐監嘅人，被嘩眾取寵嘅報道搞到終日提心吊膽。⋯⋯事無大小都舉耙，只會令入面嘅人更難受。」擺明寸緊個始作俑者同埋無腦「黃絲」喎。
網民「Jeff Li」就附和：「黃之鋒條友坐監都要當自己大爺，都on×××。」「Alex Cheung」就話「對於黃屍嚟講，腦部真係異物。」 「Cneung Shek Lee」亦揶揄：「河童嘅支持者真係好奇怪。而家係你哋嘅『主人』坐監啊。點解一定要好似佢去爆房噉（咁）要住五星級酒店先得嘅咩。唔係話要鍛鍊（煉）佢嘅意志咩。只係喺監獄瞓咗一晚就已經呱呱嘈。」
