【本報消息】巴基之星復出獲殿
前香港頂級人氣良駒「巴基之星」，於香港時間十二月三日凌晨在杜拜美丹馬場舉行之夜賽復出，由愛爾蘭騎師杜百成，出戰二千米泥地表列賽Entisar錦標，結果九駒跑第四。此役是「巴基之星」於去年十一月十七日在港出戰馬會短途錦標之後，相隔足足一年後復出，雖然杜拜首戰復出未能贏馬，但令人高興的是馬匹成功重拾競賽興趣，相信隨住狀態逐漸提升，稍後將可取得更好成績，值得期待。
早前曾確診新冠肺炎的萬人迷蘇銘倫，將於十二月十三日國際賽日起在港客串兩個多月，他已抵港並進行隔離，等到周日便可上陣。蘇銘倫已很久未有在香港客串，今次再臨香江，預計應該會非常搶手受歡迎。至於今屆香港國際賽，原來蘇銘倫在四場大賽都有坐騎。其實要跑足四場國際賽，亦不是易事，即使係冠軍騎師潘頓，在香港盃也找不到坐騎，只能坐冷板。今屆國際賽蘇銘倫會為兩匹日本代表效力，除夥拍「頌讚火星」力爭衞冕香港一哩錦標之外，他亦會為日本馬女「樸素無華」角逐香港盃。其餘兩場國際賽，蘇銘倫香港瓶夥拍賀賢「好好瑪」上陣，而香港短途錦標則策騎東廄「錶之智能」。
第四波疫情殺到，近星期確診個案急劇反彈，馬會即刻再度收緊馬場入場限制，早前巫顯東同黃皓楠亦因為住所其他樓層有確診個案即時被禁上陣，馬會對騎練採取特別嚴格嘅防疫指引無可厚非。呢一波疫情中招嘅，唔少係上流社會有錢人，過程中亦揭發咗唔少佢哋無公德心嘅自私行為。馬會現時有限度批准個別人士如馬主入場，雖然入場填表又量體溫做足，馬場廂房始終多人出入，若有中招人士入咗場，攪到爆個馬場確診群組出嚟，睇怕賽事都好難繼續正常進行。容許有馬出賽嘅馬主入場，一個人落沙圈或影頭馬相，情理上似乎講得通。不過，對於團體馬嘅馬主就唔多公平，一般嚟講入場嘅名額都係團體經理人優先，聽聞唔少團體成員已有微言，講到尾都係想影張威水頭馬相，偏偏佢哋嘅應有權益就被忽略，谷氣不難理解。馬會早前為咗國際賽，為訪港外隊人員向政府申請特別隔離安排，其實澳洲最矚目嘅墨爾本盃，今屆都唔俾出賽馬主入場，非常時期下，係咪都應該暫時禁埋馬主入場，全面杜絕馬場出現疫症傳播嘅機會呢。
