廚房佬圍外賣仔 撞歪旁人眼鏡
物以類聚，人以群分，做得「黃店」嘅人都未必係善類。有「小黃人」日前就直擊到有元朗「黃店」丼家和食連外賣仔都恰，聽見人哋話等咗45分鐘想催外賣，就搵班廚房出手打人，仲要殃及池魚撞到旁邊嘅「小黃人」眼鏡都歪埋。搞到「手足」都話：「就算係『黃店』咁又點，連最基本嘅服務態度同質素都冇 ，罷食算啦！」
網民「Quean Tang」日前係「黃谷」fb專頁「我食在元朗。你卻在大牌檔」發帖，講自己去幫襯「黃店」都被撞歪眼鏡。佢話：「唔關食事的不愉快經歷！……離遠已見井（丼）家和食門外有一年青（輕）人跟店員理論中，聽到年青（輕）人話等左（咗）9個字，我唔知是等外賣定等位……點知就在我行過時，井（丼）家和食內有另一名青年匆（衝）出來推向那青年，他腳步不穩就撞向我，我成個人撞左（咗）去近欄杆，眼鏡也被撞歪小小，……其實無論有咩事都好，希望可以心平氣和，始終出手也不太好，被傷及的途人更加無辜！」
「陳靜」就補充：「被打個（嗰）位係我細佬的朋友，係做foodpanda既（嘅）外賣員黎（嚟），事情發生係因為等佢地（哋）鋪（舖）出外賣，等左（咗）足足九個字，外賣員入去問，老闆娘態度惡劣『等到就等，等吾（唔）到就即刻走』， 繼而發生口角，之後三個廚房佬沖（衝）出嚟出手打外賣員，有人報咗警，最後外賣員吾（唔）追究，廚房佬道歉了事……最後差佬話，三個廚房唔係員工嚟，係丼家和食既（嘅）老闆黎（嚟）！」
「手足」死撐應該動武
唔少「手足」都覺得出手打人就唔啱，不過有人就惡人先告狀，死撐對付無禮嘅外賣仔應該動武。「Lychee Marie」就代表丼家和食咁講：「foodpanda 既（嘅）員工質素良莠不齊，我都未投訴佢！未到取餐時間，自己一早到，等到唔耐煩就不斷催，催唔到就發爛渣……無人理佢，佢就打開門嗌『要等幾耐幾耐』老闆娘回敬佢你等到就等，外賣仔好惡咁鬧，態度××到！……廚房聽到自己呀媽俾人×，佛都有火，衝出去推左（咗）外賣仔一下，唔小心撞到小姐，個場面就俾人講成3打1，呢個外賣仔欺善怕惡，同佢好聲好氣講唔得，仲要係（喺）到（喺度）××個女人，呢種人真係可以用文解決咩？……」
不過，「KaSing Ho」就話：「報警落案啊！唔好放過佢地（哋），如果仲有下次咁點？」「Gordon Cheng」都話：「本身已經唔係好食，仲要搞d（啲）咁既（嘅）事，點睇件事都唔會係外賣員既（嘅）錯，個餐等45分鐘仲要俾人串同打，就算係黃店咁又點， 連最基本嘅服務態度同質素都冇 ，罷食算啦！」
