闊別19年再攜手角色鬥心理戰 青雲 鎮宇拋開習慣見招拆招
電影《談判專家》由兩大影帝劉青雲與吳鎮宇聯合主演，私下甚為老友的青雲與鎮宇卻相隔19年才再度攜手合作。二人同飾演頂尖談判專家，劉青雲戲中為清洗謀殺同僚以及警察貪污案主謀的污名，不惜以身犯險佔領警局挾持人質，更點名要求由談判員改行做社工的吳鎮宇作出談判，二人施展出連場心理狀態角力的演技，青雲與鎮宇放低習慣，見招拆招。◆採訪：香港文匯報記者 阿祖 攝影：彭子文
青雲與鎮宇雖然要演談判專家，但均沒在演出前去找相關人士了解工作情況，青雲從前拍戲時都有見過談判專家，鎮宇則說：「拍電影都是『口拗口賠』，無論拍武俠片、警匪片都是一樣無規定，只是有之前的幾部戲做參考，而且網上亦有短片可看到真正的談判專家與人傾談的真實情況，也都是『口拗口賠』，個個都不一樣 。」《談》片改編自1998年荷里活電影《冇數講》，鎮宇有看過西片版：「不過節奏太慢，睇到瞓着咗，可能全英語又沒有字幕都聽不明白。」青雲反而沒看西片版，他覺得即使是改編，仍主要會看自己的劇本，畢竟不同導演、環境及演員都會有所改變。青雲在戲中有多場談判場口，但現場並非分開拍攝，而是在兩個廠景真的在通電話同步拍攝：「因為講對白都好緊要，大家食到大家的榫位，聽到對方說話的語氣再去配合，像有場戲我與戲中太太（韋羅莎）講電話，導演也叫了她來我現場這邊，我們這部戲就用了這方法拍攝，演出時感覺上可以更加緊密。」
鎮宇愛與苗僑偉傾偈
繼《喜馬拉亞星》後，這對老友相隔19年才再次合作，青雲笑鎮宇沒多大改變都是這個樣子，鎮宇搞笑說：「都係日日『萬歲』囉，係咁食我，日日蛋撻囉！」青雲猶記得戲中較少同場，但當年一起遠赴印度拍外景，要坐32小時長途車去喜瑪拉雅山的山腳，路途顛簸走過峭壁其實好危險。笑指他倆早已共度生死？青雲笑指很多人都共度生死，鎮宇即抵死地說：「就算在港拍戲，大家理論上都不會表現得懶熟，除非大家好生保，就會變得好熟，唔係呃你，我同三哥（苗僑偉）唔熟就懶係多嘢傾啦！」他相信三哥覺得他們這些後輩好健談，因為他是前輩會帶大家出去飲飲食食，在TVB食飯也靠他「萬歲」，自己才有多啖魚食吓：「所以同三哥會傾多啲，親切啲，反而同青雲無乜嘢傾！只坐隔籬一齊化妝，我同導演邱禮濤都唔傾偈㗎！」在拍攝現場少交流，是要留在熒幕中鬥戲？鎮宇笑說：「沒有，因為我用咗時間同三哥傾，無時間同佢傾！」
青雲與鎮宇份屬好友，但要讓觀眾感覺是談判專家去游說對方而不是兩個好朋友在演戲，會否難度更高？青雲表示不會特別難，但自己先要放低一些相處上的習慣：「因為吳鎮宇跟角色始終有些分別，不想觀眾看到的是劉青雲在找吳鎮宇來幫手。」青雲更認為鎮宇演出時會估得到他如何演繹，但吳鎮宇卻否認，因為他不會看對方角色的劇本：「估嚟都無用，我都唔知自己會點演？都係見步行步，喺屋企已放棄睇劇本，嚟到先算啦！因為拍得快好緊張，自己仲未記好晒啲對白，又怕冇咁細緻，所以唔想喺屋企睇太多劇本。其實有場戲同青雲有對白，講點解搵我談判，我就改咗少少負面睇法，係咪利用我的同情心？青雲就真係唔知我點解要問，因為咁樣改咗會令之後啲戲舒服啲。」今次對白中融入不少心理戰，會否演得好過癮？鎮宇笑說：「其實唔係過癮，而係好亂，又要走上走落又要收線，都幾手足無措，但我連真正戲中主謀都唔知㗎！我真係唔睇人哋啲戲，冇咁多時間，亦都無謂做呢啲嘢，睇咗後悔都嚟唔切啦，一睇話原來多我32場戲，就係咁數人哋有幾多場戲。」青雲今次都有動作演出，他表示不算多也比較簡單，但即使「演」的部分也不輕鬆，戲中他持槍挾持數名人質，令人質好驚，但其實慢慢知道自己不會向他們開槍，中間位要拿捏得好清楚：「我亦都有同大家講我揸住支槍係假嘅，但係如果真槍大家又點睇呢？而咁多個演員都有自己的想法，又加上周文健，覺得佢真係好好笑，見返佢非常之開心！」
熟知彼此底蘊默契足
青雲與鎮宇雖然不常見面，但都熟知彼此底蘊，青雲笑指鎮宇並非長篇大論的人，能將100分鐘的故事用三句就講完，理解到便理解，他又不會解釋太多，而青雲自言也是不愛去解釋的人，但會明白對方。問到有否信心《談判專家》撼贏黃子華的《毒舌大狀》過億票房？青雲覺得這輪不到演員去說，但當然希望票房好：「我哋夾手夾腳做咗部戲，聽到大家讚好睇會覺得開心，若然十年後讚都幾唔錯吖。」今次劉德華擔任監製，有否常來監場？鎮宇表示有見華仔來現場探三哥，他則與華仔不太熟絡，加上自己又怕醜。
在拍《談》片時，青雲身體出現過狀況，他指有日在拍挾持人質那場戲，雖然大堆對白但不會好難，自己卻NG了四五次：「我問自己點解，無理由吖，之後覺得唔妥有幾聲咳，當時拍戲我搬咗出去住，一Check原來中招，就Send畀導演睇，結果休息五日至復工，由於唔太嚴重，太太都冇太擔心，因為我各類型的預防針都已打齊。」但之後金像獎青雲本身要做頒獎嘉賓，結果缺席由古天樂扮他頂上，青雲說：「其實金像獎嗰次好笑，我本身有去做綵排，但有幾聲咳，我有戴口罩，返到屋企心諗點解會咳呢？諗諗吓都係唔好啦，做個快測啦，原來中咗流感，就馬上將檢測結果傳畀爾冬陞睇，話我中咗應該嚟唔到，因為我喺新聞度睇到有啲小朋友中咗流感好大件事，所以覺得要負啲責任！」
