自認超難追 做黃金單身女逍遙過活 陳法蓉愛試新工作 欲踏足歌壇？
香港文匯報訊（記者 梁靜儀，攝影 彭子文）陳法蓉（Monica）相隔6年再拍無綫劇集《一舞傾城》，飾演萬國城夜總會「媽媽生」沙靜霞（沙律），讓她再度活躍於香港觀眾眼前。Monica容貌保養得宜，雖單身多年，但一直不乏裙下之臣，她對愛情抱寧缺勿濫的態度，工作上則樂於作新嘗試，生活過得逍遙自在的她開心做個單身女人。
入行逾30年的Monica，演過無數角色，但演夜總會媽媽生則是首次，Monica認為一個演員是要百搭，而她視「沙律媽」一角為新挑戰。劇情背景圍繞上世紀八九十年代的香港，Monica稱有參考過講述歡場的電影《星星月亮太陽》及《應召女郎》，而她慶幸自己經歷過那個時代，對當年流行的服飾、髮型及化妝瞭如指掌，故最初劇組跟她提議角色造型要戴假長髮，她即時婉拒，並提議梳當年流行的「有錢人」髮型：「我個髮型喺九十年代係好（流）行，而返萬國城嘅髮型，就係參考萬子哥（萬梓良）同發哥（周潤發），因為佢哋喺戲裏一發達就會gel頭，呢個都係九十年代的signature（招牌性）髮型。」
出錢買戲服貼近角色
對於角色造型甚有研究的Monica，最愛出錢買「戲服」拍戲：「我喺TVB拍戲年代，九成嘅衫都係屬於我自己，我好鍾意跟人物性格買衫，就算連大肚婆嘅衫我都會買嚟着，（貼錢打工？）唔會，有啲衫可以着得返，不過今次因為返內地拍攝，加上當時又要隔離，行李有限就出動唔太多私伙。」讀時裝出身的Monica，認為時裝有助投入角色，而每次聽到自己有份設計的造型獲讚，當然會分外開心。
《一舞》雲集多名靚女，卻少有地沒有不和爭戲份是非傳出，Monica指今次大家合作得好和諧，好開心大家叫埋她這個姐姐玩：「之前喺內地拍戲兩個月，佢哋有時出去睇戲、食飯、唱K都會叫埋我，但食宵夜就唔得，只可以約食午餐，因為我要返屋企早瞓，因為拍劇要着高跟鞋，我仲着到抽筋，佢哋就帶我去做腳底按摩。」
拍拖以結婚為大前提
Monica貴為1989年香港小姐冠軍，保養得宜，性格爽朗、談吐風趣兼孝順，理應不乏裙下之臣，偏偏芳心寂寞了十幾年都未遇上讓她傾心的另一半。對愛情抱寧缺勿濫的Monica，揚言很多追求者：「多人追都冇用嘅，搵到真係鍾意嘅至係威，我又唔心急、唔強求，咁就繼續做個快樂單身女人。」她強調多年未有拍拖，絕非受過任何感情的傷害。
談到擇偶條件，Monica希望對方不是圈中人，因她不想看到另一半拍親熱戲，但對方要接受她是做演員，還要喜歡小動物、包容她的囉唆性格，可跟她的朋友相處得來，年紀身高不是大問題。問到可要靚仔？情人眼裏出西施的Monica笑說：「我鍾意Man啲，好似劉青雲咁，我覺得我每一個男朋友都靚仔，雖然我的朋友話唔係。」
以往Monica的男友都非富則貴，上至富家公子，下至才子，她也承認自己「很難追 」：「一開始要追我一年半載，要畀我覺得呢個人會娶我做老婆，以結婚為大前提，我先想同佢開始，否則就無謂浪費時間拍拖，我又唔鍾意收兵，同埋怕出街被人影到，要講一大輪電話先，都有追求者自然流失嘅，不過我係『戀愛腦』，一追到我就會黐到好實，重色輕友，有拖拍就會失蹤搵唔到人，甚至連工都唔想返，所以我啲朋友唔鍾意我拍拖。」可惜至今仍未遇上Mr.Right。
家人閨蜜相陪不孤單
愛情暫時未有着落，Monica亦樂得有時間照顧年邁的爸爸，因她明白子欲養而親不在，故有時被爸爸煩也覺是開心的。
早年疫情期間Monica曾長駐上海，由於當時返內地要隔離21日，她每年只可以返港一兩次，她慶幸當時得到好友兼鄰居蔡少芬（Ada）的照顧，讓她有住家飯食，令她感到家庭的溫暖，才沒那麼孤單；之後另外兩位好姊妹朱茵及洪欣因要返內地一起拍攝內地真人騷《請吃飯的姐姐》，大家決定搬到同一大廈住，互相照應，放假時又會一起食飯行街，她又幫手照顧小朋友及充當補習老師，那段時間過得很開心。身邊閨蜜都已組識家庭做媽媽，而她仍是單身一個，問到Monica又可會羡慕？Monica坦承有時會感到寂寞：「佢哋有家庭小朋友當然係開心，但有時佢哋見到我咁逍遙，都會羨慕我咁自由，講真有時都會有寂寞，但我唔孤單，我有咁多好朋友及家人。」
談到工作，剛簽了新公司「巨星傳奇」的Monica，公司其他藝人還有周杰倫、庾澄慶等，Monica透露除了拍戲還想作新嘗試，唱歌及跳舞都可以，問到歌喉如何？Monica坦承是「魔音」：「我唱歌係非常之難，但跳舞係OK，去到呢個歲數，有人肯畀機會，點解唔去試？」至於拍戲方面，她又想跟哪位合作？Monica直言真心最想跟發哥合作，哪怕只是客串。她指經常會在街上碰見發哥，對方又叫她一起行山，但自己暫時未有時間。
服裝提供：LYNEE
