自揭牽頭拍《無間道》片酬「收得順」 華仔極想將電影變成音樂劇
香港文匯報訊（記者 梁靜儀）電影《無間道》首部曲4K修復版前晚於K11 Art House舉行巨幕特典場暨生日慶典，影片導演劉偉強、寰亞傳媒集團主席林建岳博士、寰亞傳媒集團執行董事葉采得、出品人莊澄及梁超怡出席外，男主角劉德華（華仔）更驚喜現身。他們即席進行切蛋糕儀式，而全場觀眾齊聲高呼「Happy Birthday」，慶祝影片升級再現，現場更有觀眾對華仔大叫「I Love You」，華仔即回應對方「I Love You Too。」華仔又自揭拍《無間道》時製作費有限，所以牽頭收得好順，而他又一直有個心願，想把這部經典變成音樂劇，他可演其他角色。
劉偉強受訪時表示有華仔才有《無間道》，因當年開戲十分困難，大家看來是一部大製作，但預算不是大家想像中多，他說：「通常一套大片會拍40至60組戲，但我哋只可拍了22組，當時大家有種精神，開聲叫大家收順啲，但唔係落我袋，放喺製作上，大家都好幫手。」問到華仔收得有幾順？華仔坦白說：「因為我知道有幾多製作費，自己收得好順，所以就要靠林建岳三寸不爛之舌，向其他演員講『華仔都順，你哋順不順？』其實個個都順。」對於劉導演表示當年開拍影片有壓力，華仔笑言在現場感覺不到，演得好舒服，可能所有前設做得好充足。
有意原班人馬拍新題材
華仔又稱回想當時是鄭秀文、楊千嬅演出的女性電影比較勁，他與劉偉強導演想開拍男性電影，就搞了《阿虎》、《全職殺手》，之後就是《無間道》，令男性電影重振聲威。問到華仔當年拍《無》片最深刻的事？他說：「其實好像是去年嘅事，可能我老咗廿年，我仲保留戲中着嗰對鞋當珍藏，因為部戲劉偉強仲送咗部膽機(音頻放大器)畀我。」
劉導則表示其工作室有為《無》片設立專區，內裏擺放當年拍攝的櫈及道具作珍藏。問到可會再用《無》片的組合再拍攝一個新故仔？劉導說：「三集就夠晒，我覺得經典就唔好再拍，但有意原班人馬合作拍新題材電影。」
華仔則透露曾考慮將《無間道》變成音樂劇，一直想付諸實行，他說：「暫時沒有時間表，但就好想做，我當然會參演，不一定演原本角色，可以一班人撈亂去演其他角色，其實音樂劇又賺唔到錢，不過好似好有藝術性，我都係亂噏，未知可唔可行。」
梁超怡想演朝偉女友獻「初吻」
應屆港姐季軍梁超怡，當年只有6歲便有份參演《無間道》一片，飾演偉仔的女兒，她表示至今仍然難忘，她說：「記得有場戲係朝偉哥哥搣我塊面，當時要NG好多次，係好痛，但其實我係好享受呢個過程，相信好多人都好想畀佢搣，嗰陣覺得自己好幸運，但拍完之後都冇機會再見到佢。（再見到梁朝偉可會叫他搣多次？）唔夠膽，但一定會問佢攞簽名。」她又更指當年因為怕醜，不敢向偉仔索取簽名，感到好大遺憾，幸好當時仍有跟他們合照。前晚見到華仔前，超怡更笑言好緊張。
問到假若劉偉強開拍《無間道》系列電影，她可想參與其中？梁超怡說：「我當然想，但唔知有冇咁幸運，如果能參與的話，我係世上最幸運嘅人。」她笑謂不想再與梁朝偉演父女，因為對方保養得很好，不似我的爸爸。她不諱言可想演梁朝偉女友，不介意將熒幕初吻獻給朝偉，並會保持專業。
