陳毅燊挑戰體能極限 拍新歌MV連踩26小時
香港文匯報訊（記者 梁靜儀）陳毅燊（ANSONBEAN）最近為拍新歌《RISE》MV連踩26小時，由日出開始熱身運動、體能訓練、器械操肌、打拳、武術、九節鞭，至翌日日出時開始拍跳舞部分，以致精力旺盛的他都投降，收工後即攰到跪地上。雖然體力透支，但他非常滿意：「呢首歌就係要挑戰不可能！」
新歌MV中，ANSONBEAN苦練武術為友報仇，並潛入敵方將壞人打到落花流水。MV中連場打鬥，最困難的是土地問題，他說：「練習九節鞭要好大空間，唔可以喺屋企練，好驚揈傷人和打爛燈，嚟到拍攝場地空間才夠大夠高，可以盡情練習。而另一個難度係拍對打戲，有一個動作我用手撳地起腳翻觔斗同時踢倒一個人，力度要掌握得好好，太細力翻唔到觔斗，太大力又會踢傷人，NG咗幾次。」之後拍攝跳舞部分，ANSONBEAN與十位舞蹈老師配合不同角度和燈光氣氛，重複跳十幾遍，長達26小時拍攝後終於收工，ANSONBEAN笑言由早上「大隻仔」，收工時已變成「細隻仔」。
