【本報消息】日本馬唯獨愛你揚威美國
上周六朝早兩場美國轉播賽賽果塵埃落地，一級賽育馬者盃一哩大賽由英國代表「太空藍調」以大熱門身分勝出，鞍上人為香港馬迷好熟識之布宜學，此駒一級賽兩連捷，更成為三項一級賽盟主。育馬者盃一哩大賽亞軍為主隊美國嘅「暢遊海峽」，鞍上人為李寶利。「逸帆影」跑第三，第四名為「狂放牛」。至於一級賽育馬者盃草地大賽亦由英國隊捧走，「伊比爾族」喺布宜學胯下贏得呢項重要錦標，首度挑戰一級賽即勝出，呢匹三歲「杜拜威」子嗣真係前途無可限量。愛爾蘭代表「波爾明」跑第二，英國隊「天愛麗」跑第三，愛爾蘭隊「日出之國」跑第四，換言之歐洲隊喺呢項二千四百米一級賽包辦前四名。
今次育馬者盃賽日，香港馬會只轉播及受注兩場賽事，但同日另有七場一級賽上演，當中最矚目一定係總獎金高達六百萬元嘅泥地二千米育馬者盃經典大賽，一跑泥地大賽又係主隊美國嘅天下，結果Kincks Go喺名將羅沙理奧胯下勝出，此駒上年勝出育馬者盃雌馬大賽，今次「升呢」挑戰高難度照贏，實力真係唔簡單。值得一提，Kincks Go馬主為Korea Racing Authority，美國代表、韓國勢力，真係幾特別。此外，其實日本隊都拎到好成績，Marche Lorraine喺莫艾誠胯下勝出育馬者盃泥地雌馬大賽。至於上年喺何澤堯胯下在港勝出女皇盃嘅日本代表「唯獨愛你」，今次由川田將雅主策，結果勝出育馬者盃雌馬草地大賽。
日本頂級雌馬「創世駒」早前出戰法國凱旋門大賽無功而還，欲為日本爭光夢碎，馬主Sunday Racing宣布，由於明年以6歲之齡將要強制退役，成為牝馬投入配種行列，故此鎖定今年拆禮物日終極之戰為二千五百米一級賽嘅有馬紀念賽，務求爭取光榮退役。「創世駒」並未有報名今年香港國際賽，反而選擇有馬紀念賽，除了力爭衞冕，若然成功奪標，將會成為日本賽馬歷史上首匹連續兩年完成寶塚紀念賽及有馬紀念賽兩項Grand Prix春秋制霸嘅佳駟。自法國賽後返國後，「創世駒」目前仍於北方牧場放草，由於嫡系北村友一繼續養傷，屆時繼續由李慕華執韁。雖然「創世駒」以出戰有馬紀念賽為光榮任務，但要面對不少精英圍攻，當中包括新勝秋季天皇賞嘅「樂透心」以及菊花賞一放到底勝出之「領銜」，橫山武史兩匹帥權二揀一，結果揀騎前駒，而「領銜」則會由其兄長橫山和生接手上陣。
應屆英國冠軍錦標得主「笑來威」，原本夠資格出戰美國育馬者盃草地大賽，最終未有成行，不過呢匹馬並未有歇冬意圖，反而另有目標，就係一心計劃來港跑國際賽，出戰最高榮譽嘅香港盃。據練馬師羅修彥透露，喺「笑來威」贏完英國冠軍錦標之後，他與馬主方面亦認同，此駒來季必可大放異彩，但因為今季狀態來得較慢，直至上場才揚威一級賽，為免浪費目前勇態，幕後傾向部署遠征，香港國際賽正係首選目標，但因為香港目前入境檢疫制度繁複，仍需等待香港賽馬會嘅回覆作實。「笑來威」今季在法國本土戰績一般，最佳成績曾於法國打吡不敵「金教堂」取得亞軍，到前一仗出戰法國凱旋門大賽，強手對壘下只跑第五，直至上場轉戰英國，才告敲響今季勝鼓。
皇者精芯受傷長唞
希斯旗下兩戰不敗新星「皇者精芯」，因為右前腿肌腱受傷，證實需要長唞，下季才能上陣，希斯表示已向馬會申請，期望批准此駒運返澳洲靈犀牧場，得到更完善的調理，待傷癒後才運返香港服役。據希斯透露，由於「皇者精芯」傷勢不輕，必需要有理想環境及貼身照顧，但礙於沙田馬場地方寸金尺土，即使從化有理想環境休養，卻又很難得到自己及獸醫全天候照顧，因此與馬主陳國泰商議後，最佳方法係先行運返其家族靈犀牧場休養，並且可以得到兩位囝囝照顧，自然放心得多。如今已向馬會申請，且看是否獲得批准。若然成行，一對「皇者」系除「皇者精芯」外，去年引入前法國二千堅尼亞軍「皇者峰範」，亦會一同去澳洲，後駒亦係同樣命運，受到左前腿肌腱受傷困擾，在港跑過三仗無功，至今已九個月未再上陣。對於「皇者峰範」去向，希斯並不排除此駒有機會留在澳洲發展，但一切仍需視乎傷患進展，再作決定。
