【貴圈真亂】公審偷錢「手足」 黃店「貓哭老鼠」
黃店最叻口蜜腹劍，把口就話視「手足」為兄弟，但一講到錢就反轉豬肚。好似黃店「初見」前日就喺facebook上載同一名年輕人嘅WhatsApp對話截圖，話呢位欠人錢嘅年輕人承認偷咗2,342蚊，「初見」一邊聲稱自己當年輕人「好似屋企人咁」，一邊就擺上網公審，問網民應唔應該畀機會定踢佢走喎。有網民就一唱一和留言寸間黃店：「你哋咁大個人，呢啲嘢唔駛（使）攞出嚟問，應該識自己解決。」「佢揀C：拎出嚟公審。」
「初見」以「求意見」為題喺fb發帖話：「年輕人攞咗我哋『初見』一啲緊急錢，雖然金額唔係好大，但令到我地（哋）十分之失望……佢解釋嘅原因……唔夠錢還比（畀）朋友……如果係你，大家會如何處理？『A. 比（畀）機會（後續跟進）』『B. 踢佢走（離開綠洲）』『C. 大家有冇更好的意見？』」
「初見」聲稱，自己當呢位年輕人「基本上係好似屋企人咁」，佢病咗時會關心佢，而呢位年輕人亦願意幫手做「家務」等。
黃絲明明話過核爆都唔割，但覺得偷錢嘅就永不超生咁。「Hiu Lam Wong」話︰「我唔會原諒，即刻踢佢走，正一反骨仔。」「Nahc Icec」亦話︰「B，大個（仔）啦，做錯野（嘢）要學識自己承擔責任。」係囉，啲黑暴分子被判刑又唔見佢哋咁講嘅？
唔少網民就認為有人貓哭老鼠，實質公審「手足」。好似「Maggie Kwan」留言話：「點處理我估你心裡（裏）有數，『公審』可能係你嘅處理方法嘅其中一項。幾百個留言嘅評論，應該都夠年輕人難受。」
「Shirley Wang」都話：「如果係家人，我一定唔會擺上網問人攞意見。正常會坐低好好咁傾吓偈，畀機會改過……我好好奇囉。你啲（哋）係專業幫助年輕人嘅組織啩？點解唔私底下溝通？」點解？大家心照啦。 ●香港文匯報記者 黃書蘭
