【貴圈真亂】「堅韓燒」執笠在即 中伏黃絲圍爐恥笑
由經常發表撐暴言論嘅時評人蕭若元作招徠嘅屯門黃店「堅韓燒」，日前喺店面張貼結業倒數大字，卻引嚟唔少網民鬧爆抵死。原來「堅韓燒」早前經已劣評如潮，一直俾網民鬧爆冇餸食、服務差、唔好食、上菜慢，難怪班「手足」都回歸現實話：「無質素，幾黃都無用。」
漏單態度差 放題無餸食
網民「神經病患者」日前喺「連登」發帖講「堅韓燒」進入結業倒數，佢話：「上網睇其他評論，似乎呢間野（嘢）都係質素麻麻……如果間野（嘢）真係咁×，真係抵佢執笠，記得岩（啱）岩（啱）開困（嗰）陣都好多人排隊。不過講到尾無質素，幾黃都無用。」
雖然「堅韓燒」就嚟執笠，但唔少網民都覺得難解心頭之恨。「佛你跑」話：「真心難食，叫野（嘢）又黎（嚟）唔齊。」「慈父菲利普」就話：「大約八點半入座，限90分鐘，九點半cut（截）單，但係入座已經無哂（晒）自助餐區野（嘢）食，樓面話廚房唔再攞野（嘢）出黎（嚟），之後成班嘈完，先至變左（咗）d（啲）野（嘢）攞出黎（嚟），仲要講到好似施捨咁，痴（黐）×線放題唔要求好食，但癲到連野（嘢）食都無，第一次試，仲要變出黎（嚟）果（嗰）d（啲）野（嘢）食根本唔夠……果（嗰）個餐$208，貴少少$268，原來收左（咗）錢可以唔比（畀）野（嘢）人食……最on（戇）×既（嘅）係仲有人覺得無問題。」有網民亦都話：「佢呢間啲態度都差到×街，同埋試過叫咗嘢冇送齊。」
有網民就奉勸「手足」唔好再以身試伏。「萊佛士花」話：「中過伏一次，冇下次，真係難食，唔值呢個價。」「RAYIXR」就話：「呢間野（嘢）真係好難食，絕對冇下次，我果（嗰）次係有野（嘢）食既（嘅），但係款式好少同好頹，$100都畀多好多佢果（嗰）隻，奉勸大家唔好試。」「VQ」都話見到網上有好多劣評，唔明「點解咁都會有人去『打大佬』」。呢啲咪叫有自唔在，攞苦嚟辛囉！●香港文匯報記者 黃書蘭
