【網議政事】黃文萱「跪」退公民黨 黃絲嘆攬炒派信唔過
公民黨嘅退黨潮真係好似電視台啲肥皂劇咁，播極唔完而且一集好笑過一集，今次嘅主角就係公民黨執委、沙田區區議員黃文萱。話說黃文萱嘅言行喺攬炒派嚟講都算係非常出位，例如喺香港國安法實施後仍然高調展示「港獨」旗，印刷「港獨」文宣同批鬥「藍店」嘅橫額，喺支持者心中樹立「撐到盡」嘅形象，點知佢噚日就喺fb宣布退出公民黨，仲話會喺區議員需要宣誓前辭職，搞到唔少黃絲網民大跌眼鏡，慨嘆攬炒派到頭來都係信唔過。
公民黨近年涉嫌勾結外國勢力，去年更因參與「初選」，多名前成員被控違反香港國安法，唔少黨員都爭相退黨保平安，而從去年至今，已經有差唔多有20人退出公民黨嘞。
今次退黨嘅黃文萱，喺去年香港國安法生效後，仍然喺其辦事處掛起印有「光復香港 時代革命」嘅黑色「港獨」旗，仲好高調咁影相放上fb，其後又多次印刷「藍店不了」嘅橫額。
曾高調議辦展示「港獨」旗
今年1月，多名參與「初選」嘅攬炒分子因涉嫌違反香港國安法被捕，但黃文萱未見收斂，仲好高調咁喺辦事處搞印揮春活動，提供一堆印住「光復」「香港」「時代」「革命」等字眼嘅「港獨」印章畀市民，令當時唔少網民都覺得佢「好有膽色（識）」。
雖然黃文萱最終都係「跪低」喺fb宣布退黨，但佢跌咗落地都要揦返拃沙，聲稱：「本人素來『冥頑不靈』，即使在《国安法》（香港國安法）通過後，辦事處內的文宣……『光復香港時代革命』的旗幟已反轉倒向牆掛外，基本上都沒有拆除。」
「Tony Choi」就質疑：「冥頑不靈就唔好退黨，留到最後啦！」「David Pau Chi Ho」就回應：「算數啦，再唔走遲下（吓）冇得走，宜（?）家大家排住隊走當然跟大隊，冇咁樣衰。」
「Martin Chu」就揶揄：「下次Fxxk（法）輪功要係（喺）街度噴『天滅公民黨』」「Stanley Kam」亦話：「真‧退黨保平安。」
俗語話「爛船都有三斤釘」，?家連黃文萱呢啲咁出位嘅攬炒分子都退出公民黨，睇嚟公民黨就快夠鐘沉船了。
●香港文匯報記者 雨航
