【本報消息】蘇銘倫擬長期留港
即將踏入新的一年，向來係歐洲騎師客串嘅高峰期，獲發牌嘅北半球騎師好多係頂級好手，馬迷有機會親眼目睹高手嘅騎技，可以話係雙贏局面。過去的一年，全世界受到新冠肺炎疫情影響，賽馬一層自然唔例外，今季本地賽事亦有少少轉變，季初開始多咗歐洲騎師作中長期客串，某程度改變咗近年無乜變動嘅基本騎師陣容，相信馬迷亦樂於看見。
莫雷拉同潘頓近年壟斷香港馬圈，外來騎師嚟客串咪話想搵食，想搵隻比較有實力嘅馬跑都難，馬會搵公司騎師越來越難，不過今季嘅騎師陣容確係多元化咗，有巴度、賀銘年、彭國年呢啲騎得嘅歐洲騎師長期留港發展，無疑提升咗賽事嘅競爭力同觀賞性。多咗歐洲騎師願意放棄祖家策騎事業，過嚟香港長期策騎，好大程度亦係同疫情有關，現時歐洲多國疫情仍然好嚴重未受控制，而有名氣嘅騎師經常要飛嚟飛去周圍跑，要合符各國嘅檢疫同隔離措施都非常麻煩，甚至被逼取捨跑唔到某啲賽事，騎師本身亦都驚中招確診。相對喺香港跑馬真係安全同穩定，馬會為公司騎師提供嘅待遇同福利亦優厚，聽聞呢期好多歐洲騎師都想獲馬會發牌。
喺普羅馬迷立場，多啲頂級好手喺香港跑當然歡迎，好似已經好多年無喺香港季約形式客串嘅蘇銘倫，就會留低客串至明年二月十四日，雖然檢疫期間一波三折，但最終亦排除萬難於剛周日上陣獻技。蘇銘倫騎功有幾硬淨就唔使多講，過往在香港曾經十二勝一級賽，加上此位比利時好手最低可做一二○磅左右，因此他的到來不只潘頓受影響，就連可造輕磅的莫雷拉、田泰安亦受到威脅。蘇銘倫近年最多都係大賽日嚟客串一日半日，希望佢今次客串正式出賽時，練馬師俾多啲實力馬支持佢。其實練馬師都唔使盲目強求搵潘頓同莫雷拉，賠率又熱又未必穩贏，依家有唔少好騎師供選擇，好馬有實力起用其他騎師一樣贏得。蘇銘倫雖然只客串兩個月，但有傳他或長期留港發展，但最終決定視乎這兩個月的成績。
另外，潘頓早前喺社交平台出文，問香港係咪有騎師被驗出對新型冠狀病毒呈陽性反應，結果俾競賽董事小組裁定佢行為不當，罰咗四萬蚊。馬會早前突然公布蘇銘倫因為檢疫問題唔可以跑國際賽，所有坐騎排位後要換人，但係發放嘅消息又唔清唔楚，點解蘇銘倫做晒十四日隔離都唔可以出賽，好多人已經對蘇銘倫嘅狀況有疑慮。作為騎師，當然緊張有冇同僚中招，關乎切身健康，出文都係表達喺騎師立場嘅疑問，出發點亦唔見得有乜惡意同攻擊性，偏偏被大造文章呢種毫無透明度嘅做法先至引起外界恐慌。不過，騎師要顧住個牌照，對住呢種管制言論嘅專制態度，大概只能無奈接受。
