【獨有消息】和氣生財巴度補中
係人都知方嘉柏向來谷草成績特別好，但論谷戰最標青的騎師，除三大天王外，就是巴度，現時取得十七場頭馬，谷戰佔了十一場，點勁法，大家睇睇他最近三場谷戰馬，有「帖木兒」贏得跨季三連勝，之前兩仗由田泰安贏，贏馬升班後，因安仔停賽換上巴度，一樣可以交出凌勵後勁完成三捷；「明德之星」季內在巴度胯下三連勝，開齋一仗贏四分三馬位，到最近兩捷是贏一條頸位及短頭，難怪評磅員每仗加分都唔多，一匹三捷馬仍可留在五班列陣，足見評磅大員只是認為能贏得的每仗，並不是馬匹有超凡之質，只是贏在有個好騎師而已；又如蘇偉賢的「喜佳龍」，潘頓季初出盡法寶才能贏「會長之星」，到最近的一仗，交巴度胯下再跑季初贏馬路程谷草千二米，這匹馬竟可勝「共創繽紛」，同是一匹馬，巴度手上發揮尤其是谷戰，可以跑高多半個或一個馬位。今次潘頓停賽，蘇偉賢當然又要執住巴度作為搏殺扶手棍，一直由潘頓騎開的「和氣生財」，今次又跑谷草一千米，這個路程季內練馬師經已部署過兩戰出擊，首仗得第四，最近一仗得第二，敗於「南區寶」蹄下，該仗「南區寶」以一個身位擊敗牠，「和氣生財」的鞍上人是潘頓，今次馬房用了巴度上陣，假如以這位法國好手的工夫，平均跑高坐騎半個至一個馬位，今次「南區寶」要再贏牠相信並不容易，起碼在磅位方面，兩者已拉近到僅差一磅的距離，用巴度絕對有反先的能力。
