【網議政事】離任被「同路人」鞭屍 朱凱廸聲稱被屈
自己人搞死自己人，真係攬炒派永恒不變嘅定律。「議會陣線」朱凱廸同陳志全講離任講咗咁耐，終於都兌現「承諾」向立法會秘書處遞信辭職，點知咁都俾「同路人」鞭屍，鬧佢哋想走就走、想留就留，唔好講咩走咗仲會監察留低嘅議員，點知朱凱廸就彈出嚟呻冤枉，叫「同路人」唔好作嘢喎。冇計啦，做得攬炒派就預咗俾「同路人」攬炒㗎啦！
決定傳統「飯民」立法會議員去留嘅「民調」終於揭盅，早前話唔想再講呢個話題嘅立法會前議員區諾軒又彈返出嚟鞭屍，話政治人物應該領導民意，唔應該俾民意牽引，不論離任定延任，只要講清楚理由就足夠，可惜主留「飯民」決定匿喺民調後面；至於朱凱廸同陳志全想走就直接打辭職信，唔應該問完其他「飯民」議員走唔走後，又唔當一回事喎。
今屆被裁定非妥為當選而離開議會嘅區諾軒，喺踩「同路人」嘅時候亦不忘抬高自己：「如果我尚在議會，開局應該再花更多心機寫論述，最重要係政治路線」「花多D（啲）精力關注下（吓）、幫助下（吓）受逼害的（嘅）香港人好過啦，打左（咗）咁多我都覺得自己浪費時間。」
劉細良拍片疑分化「同路人」
以「時評人」自居嘅劉細良亦拍片踩朱凱廸，仲疑似分化「同路人」：「朱凱廸話自己唔留任，仲會監察留低嘅『泛民』，我覺得好奇怪，朱凱廸嘅鬥爭對象乜唔係共產黨咩？」
俾人係咁鞭屍嘅朱凱廸終於忍唔住，出聲懷疑「同路人」屈佢：「唔知（劉）細良邊度聽到啲我冇講過嘅野（嘢）。」
網民諷朱「老屈都係學你」
唔少「黃絲」都替朱凱廸唔抵，好似「Joe Lee」就鬧劉細良：「佢啲資料成日都唔準確，冇做好功課就吹水……」「Chi Pan Fung」就問：「（劉細良）為左（咗）維護『泛民』可以去到幾盡？」
不過，亦有撐傳統「飯民」嘅網民反咬朱凱廸，「Tommy Chan」就話：「咪學你囉，老屈既（嘅）野（嘢）只要講多幾次傳開去就係真，唔駛（使）證據。」
「Kelvin Yu」就問：「錦鋰（咁你）有乜高見？委任（終審法院常任法官）張舉能你哋投咗咩票？修改議事規則你哋又投咗咩票？」
「Mimi Chan」就問區諾軒：「其實你係咪被人踢咗出去，?家連匿喺『民調』後面或者辭職都冇資格做，所之（以）先喺度發牢騷？之前就話唔講咁多，?家又馬後炮，講到尾你咪又係眼紅，想踩低人哋嚟托（抬）高自己啫。」 ■香港文匯報記者 鄭治祖
